Wolfgang Egli: Gesang, Gitarren, Hammond, Hohner Orgel
Daniel Weniger: Bass, Gesang
Michael Duss: Gitarre
Alexander Egli: Schlagzeug
Josua Weniger: Saxophon
Lars Walder: Trompete

Nachtflug
dä Kaiser
flügt us äm Fenschter
im 3. Stock
son'än Flug isch
nöd sehr günstig
vorallem denn wemmer a die sensible Bauteil
vom menschliche Körper denkt

uf dä Tanne vis à vis
luegt ä grüeni Fee
sie hät ziemlich sicher alles gseh
zum Bispiel wie dä Kaiser
sini Flügel usbreitet hät

dä Kaiser
flügt us äm Fenschter
im 3. Stock
S'isch Oktober
und ziemlich finschter
und dä Nebel chrüücht dur ä mittelländisches
mittelständisches Dorf

us em letschte Loch grad unedra
luegt än Erdgeist
er hät wieder emol gar nüt gseh
und er zücht dä Chopf zrugg
wo dä Kaiser z'flüüge chunnt

dä Kaiser
flügt us äm Fenschter
im 3. Stock
es flüged Nachthünd
es flüged Gspenschter
und sieht no cool us ähnlich wien ä Szene
us Karls küehner Gasseschau

öppis guets
es hät au öppis guets
wenn all die schöne Träum verfloge sind
und s' hät au öppis guets
wenn mer s'Läbe vo dä dunkle Site kennt
und s' hät au öppis guets
wenn süesse Honig plötzlich bitter schmeckt
und s' hät au öppis guets
wenn dä Tüfel nüme bloss im Detail steckt

und s'hät au öppis guets
wenn's eim emol
so richtig uf dä Seggel schneit
wenn alles dä Bach ab goht
und s'hät au öppis guets
wemmer vom Himmel
obenabegheit
und eim do une 's Lache vergoht

und s'hät au öppis guets
wemmer sini Unschuld verlore hät
und s' hät au öppis guets
wemmer kapituliert vor dä Realität

s'hät au öppis guets
wenn's eim emol
so richtig uf dä Seggel schneit
wenn alles dä Bach ab goht
und s'hät au öppis guets
wemmer vom Himmel
obenabegheit
und eim do une s'Lache vergoht

aber mached mer
üs
nüt
vor

13 Stund
wo dä Kaiser s'erscht Mol sin Name ghört
im'ne wisse Bett und echli verstört
"Herr Doktor zeichnet sie mer ä Schof"
"i cha doch nöd zeichne, Herr Kaiser, i bi schliesslich kein Pilot"

wo dä Kaiser s'erscht Mol lauft am Stock
i drü Viertelschund rund um dä Block
und er müesst jo nöd emol lüge
zum säge laufe seg viel schwieriger als flüge

wo dä Kaiser s'erscht mol i sinere Wohnig isch
liit än Abschiedsbrief uf em Tisch
und ä Plastikrose wo am Spiegel chläbt
hät siebe Woche ohni Wasser öberlebt

wo dä Kaiser s'erscht mol i sim Garte stoht
gsieht er grad no wie d'Sonne undergoht
und es wird dunkel und duuret 13 Stund
bis i sim Rogge d'Sonne wieder chunnt

Min Garte
i sitzen i mim  Garte
wo alles drin gedeiht
bloss nöd das won i will
i han ä grosses Gartebuech
wo drin stoht wan'i mache muess
scho sit äm April

i ligge uf em Ranze
und warte uf diä Pflanze
und s'wachst alles öber min Chopf
plötzlich wachst ä Rüebli
mer i's Magegrüebli
das schmeckt besser als alles wo
hett sölle cho

i weiss no i dä Schuel
isch dä richtig Weg wichtig gsi
zum richtige Resultat
isch s'Resultat nöd richtig gsi
hät's immer no es paar Pünktli geh
för dä richtig Weg

i ha dä richtig Weg probiert
ha lang hin und her studiert
und mängmol hät's au öppis gnützt
dä richtig Weg isch ehrewert
doch lieber han i's umgekehrt
lieber als dä richtig Pfad
han i's richtig Resultat

i ha scho lang es Aug uf di gworfe
so ganz still aber bloss es Aug
nützt glaub nöd so vill
i müesst äs Lasso werfe
aber Lasso werfe chan i nöd
zumindest nöd bis is Ziel

i müesst schö si und agil
geduldig wien äs Krokodil
und starch wien'än Elefant
spannend wie dä Potter Härry
miech a super Karriere
schöner wär's wenn i di öberchiem
ohni dass i di verdien

nöd dass ehr mi falsch verschtönd
i ha gern Lüt wo öppis chönnd
und bewundere sehr
all die Akrobate
mit ehrne Heldetate
doch lieber als alles Gschick
han'i …….Glück

i sitze i mim  Garte
wo alles drin gedeiht
bloss nöd das won i will

Amateur
Kaiser
säg wie häsch es
bisch immer no do?
häsch dis Raumschiff verpasst
oder händ's di nöd mitgnoh?

villicht händs di gseh
händ abdreiht
und sind dävo
i glaub Kaiser
die wönd kei Bsoffni
uf em Moo

Kaiser
wa wötsch du flüge
du bisch nöd dä Typ däför
so Lüt wie du
sind gmacht zum tauche
du Amateur

hett'sch nu chli länger
müese warte
dänn wär äs U-Boot cho
die säbe sind nöd so heikel
die hettet di sicher gno

Kaiser
nu ei chlini Frog
machsch du eigentlich au
Passagierflüg?

So Lüt wie di
am Bahnhof
a dä Busstation
bim Zahnarzt
und am Telefon
bruchts Lüt wie di
und im Hallebad
im Uusverchauf
am Bankomat
i dä Multergass
im Reisebüro
bruchts Lüt wie di
und im Kinderzoo
vor em Fernseh
und im Internet
i dä Chrankekasse
und z'Nacht im Bett

so Lüt wie di hät's scho immer geh
vo däne bruchts viel
vo däne bruchts meh
uf dä Autobahn
im Morgestau
bruchts Lüt wie di

för grossi Gfühl
und chlini Vergehe
för Halbwohrheite
und Schnapsidee
bruchts Lüt wie di
und zum akzeptiere
wie's isch und flueche
bim fotokopiere

so Lüt wie di hät's scho immer geh
vo däne bruchts viel
vo däne bruchts meh
för übli Gedanke
und füechti Träum
bruchts Lüt wie di

villicht häsch du di
au scho mol gfrögt
för was du guet bisch
und för was nöd
du suechsch än Sinn im Läbe
ä Rechtfertigung
däför sozäge
dass du Suurstoff verbruchsch
und Metan produziersch
warmi Luft uselosch
und transpiriersch
s'brucht nöd soviel
för d'Mitgliedschaft im Club
s'langt wemmer schnuft und schloft

so Lüt wie di hät's scho immer geh
vo däne bruchts viel
vo däne bruchts meh
wenn d'Menschheit
öberlebe will
bruchts Lüt wie di

vo dän andere
bruchts nöd so viel

Dä Ruedi G us O
dä Ruedi G. us O.
hät scho als Chind
den anderne s'Spielzüg weggnoh

dä Werner F. us I.
hät scho früehner bschisse
bim Monopoly

muesch no luege Bueb
so eine chunnt nöd wiit
irgendwenn isch gnueg
Gerechtigkeit hät Ziit

dä Silvan K. us A
hät scho immer
a grossi Schorre gha

dä Konrad W. us Z.
hät immer gloge
wenn er s'Muul uf tue hät

muesch no luege Bueb...

dä Oswald G jo dä
und dä Marcel O und dä Lukas M
und au dä Martin E

und au dä Daniel V
und dä Chaschper V
und dä Viktor V
und au dä Josef Ackermann us D

muesch no luege Bueb...

Min Schatz
s'isch nöd alles eso guet
aber au nöd eso schlecht
wie du meinsch
und sie isch nöd so schön
aber au nöd so gemein
wie du findsch
dini Wuet isch nöd so gross
dis Herz nöd so rein
und d'Nacht nöd so schwarz wie du denksch

chomm
doch
obenabe
min Schatz

me sieht nöd no guet
mit em Herz
sondern au mit em Buch
und em Chnü
und emend z'letscht au no mit dän Auge
du Genie
wa wötsch du so wiit
uf en Asteroid
i d'Weltraumprovinz
hey du bisch dä Kaiser
nöd bloss en Prinz

chomm
doch
obenabe
min Schatz

d'Erde sig ä Chugle meint mer hüt
früener hät mer gmeint sie seg ä Schiibe
stimmt beides nöd
d'Erde isch än Naseböögg
i dinnre Nase
und wenn d'nasegrüblesch
git's än Sturm im Pazifik
und au s'All isch nöd so
unendlich wie mer immer wieder tuet
s'hät under dine Fingernägel Platz
und was dä Albert Einstein
usegfunde hät
das wössed d'Indianer
scho lang
min Schatz

Indianer
erscht grad no
simmer Indianer gsi
und dänn sind die cheibe Cowboys cho

erscht grad no
simmer Cowboys gsi
und dänn sind die cheibe Astronaute cho

erscht grad no
simmer Astronaute gsi
und dänn sind die cheibe Sozis cho

erscht grad no
simmer Sozis gsi
und dänn sind die cheibe Goofe cho

erscht grad no
simmer Goofe gsi
und dänn sind die cheiben Indianer cho

erscht grad no
simmer Indianer gsi
erscht
grad
no

Siebezwerg
wenn d'vor dä Hustür stohsch
und din Schlüssel nöd passt
wenn du d'Töre ufbrechsch
und i dä Stube ine stohsch

wenn's vo Esse schmeckt
wo du nöd gesse häsch
und im Chüehlschrank
dis Lieblingsyoghurt verschwunde n'isch

denn bisch du än Schneewitwer
oder än Siebezwerg
zerscht komisch und denn tragisch
oder umgekehrt

wenn's Telefon schellt
und dini Muetter di nöd kennt
wenn im Fernseh Werbig lauft
und än Fremde uf em Sofa pennt

wenn ä Frau usem Badzimmer chunnt
mit lange schwarze Hoor
mit me unvertraute Parfüm
und me Diamant im Ohr
wenn sie ä Sproch redt wo du nöd verstohsch
und der denn än Kuss git und goht

denn bisch du än Schneewitwer
oder än Siebezwerg
zerscht komisch und denn tragisch
oder umgekehrt

Luftibus
sie isch wie gmacht
diä Winternacht
zom ellai ometschumple
bis d'Stadt verwacht

mer passed nöd zäme
dini Fründin sait's au
du bisch ä Strandmuus
und ich ä Meersau

es isch no glatt
i dä Innestadt
versunke i ne
Werbeplakat

mer passed nöd zäme
chomm bliibed mer uf em Teppich
du bisch ä stills Wasser
und ich än Wellesittich

es macht no Spass
i dä Multergass
d'Nase platt
am'ne Schaufenschterglas

es amüsiert
wien' ä Träne gfrüehrt
i däm Moment
wo sie dä Bode berüehrt

mer passed nöd zäme
chomm mer mached Schluss
du bisch än Atemzug
und ich än Luftibus

es isch originell
a dä Bushaltestell
und s'chunnt kein Bus
au nöd eventuell

Hey Mäx
hey Mäx
chomm bring mer nomol eis
nochher gang i denn
i chauf  der seb Bild ab
säg verchaufsch es?
i zahl der jede Priis
wer isch die seb Frau döt druf
die gliicht einere won'i kenn
die hät au son ä Frisur
aber än anders Parfüm

hey Mäx
lueg der dä Schuum a
wie früener amel i dä heisse Badwanne
am  Samschtigobig
und jetzt bad i mini Seel
im'ne chalte Bier, super hä Mäx
säg häsch früener amel au
am Samschtigobig badet?

hey Mäx
chomm bring mer ä heisses Bier
eis mit viel Schuum
won' i drin cha bade
hey Mäx
chomm i helf der abwäsche
jo denn spinn i halt
hey Mäx
du bisch än liebe Siech
ohni di wär i jetzt am Arsch

hey Mäx
säg chann i bi der penne?
i bruch doch kei Näscht
i schlof au uf äm Bode
s'isch sowieso bald Morge
wie spot isch eigentlich?
ok denn halt nöd
isch scho guet Mäx